ورق الكافور

ورق الكافور دواء مجانى فى كل حتة فيكى يامصر ومحدش يعرف عنه حاجة .
وأنا سايق عربيتى فى طريقى لبلدى و أنا رجل ريفى و أتشرف بذلك ببص على يمينى و شمالى وأشوف الترع وعليها الشجر الشامخ شجر الكافور و التوت والجميز و بستغرب جدا و بسأل نفسى سؤال معقول الناس مش عارفه فوايد الأشجار المعجزات دى دا دواء مجانى تروح وتقطف و تجيب منه زى مانت عاوز بغض النظر عن موضوع المقال النهاردة بس إزاى حد يفهمى إزاى يكون فيه مريض سكر فى مصر و شجر التوت ده موجود ولا مريض حساسية صدر فى مصر وشجر الجوافه موجود يارب أكون سبب إن الناس يوصلها الحد الأدنى من المعلومات الخاصة بالنباتات الطبية الفعالة فى الأمراض الأساسية وتبعد قدر إستطاعتك عن الكيماوى والله قاتل أنا محدش درس الأدوية الكيميائية زيى و عشت فى حيدرأباد فى الهند وشفت بعينى مصايب إنتاج خامات الأدوية والشوائب لذلك بتجنب الكيماوى قدر استطاعتى .
المهم الكافور :- 
الشجرة العملاقة دى اللى بتزرع فى مصر أساسا كمصدات للرياح عشان الهوا بيزعل المحاصيل فدا أساس وجودها و زراعتها هات منها الورق بقا و تعال أقولك بيعمل أيه ؟
١-لو جالك برد بدون تفكير إشرب ورق الكافور بإنتظام لأنه هيوقف إلتهاب صدرك و يوسعه و هيدوب البلغم .
٢- مش بس كده كمان دا انت لو شميته وعملت منه حمام ميه فعال جدا فى علاج مشاكل الأنف و الجيوب الأنفية و إنسدادها و مزيكة حسب الله بليل قصدى الشخير .
٣- إما هتشم الكافور فى حمام ميه زى اللى فى الصورة كمان هتعالج حساسية الصدر طبقا للدراسات المنشورة عنه .
٤- شوفى إزاى يكون عندك جفاف فى شعرك و بشرتك وجلدك وحاسة إنه قشف كده و الكافور موجود الدراسات بتقولك إغسلى شعرك وجلدك بمغلى ورق الكافور عشان بيزود مادة السراميد اللى بتنعم الجلد وتخليه حرير .
٥- لا ألم أبدا مع الكافور دهان العضو الموجوع بكمادات ورق الكافور زى الظهر و لا الركبتين يقضى على الالام فورا فيه مادة فعالة مسكنة إسمها ليمونين .
٦-ورق الكافور الشاى بتاعه هتحس بعدها بالطمأنية و الراحة النفسية الدراسات بتقول مش بس بيعالج التوتر لا و الضغط كمان .
٧- لو غسلت فمك بمغلى ورق الكافور هتخلص من مشاكل وإلتهاب اللثة و النزيف وكمان تكوين البلاك والجير .
٨- لو غسلتى بيه شعر بناتك هتخلصى من القمل اللى بيجلهم من الحضانة والمدرسة ومعاها الينسون أيضا فعال ف ذلك .
فى النهاية الكافور جميل وفعال خاصة فى مشاكل الأنف والصدر استنشقى بخاره بعد غلى مقدار كف من الورق فى نص ليتر ماء و بعدين اغسلى بيه شعرك وجلدك واتمضمضى بيه ومفاصلك ولو متوترة اشربى شوية وهتدعيلى 
شير لغيرك موجود ببلاش فى الشوارع فوايده عظيمة .
دمتم بصحة
الدكتور أحمد أبو النصر